تفاصيل قانون المرور الجديد ..وتفعيله خلال أسابيع
الجورنال الاقتصادى:
ضرتك وأنت رايح المرور عشان تجدد رخصتك هتبدأ السنة الجديدة بتاعتك بـ عدد 50 نقطة وبعد كدة العداد هيبدأ يعد عليك طول ما أنت سايق وعمال بتعمل مخالفات طيب ازاى ؟؟
لو أنت سايق وبتكلم فى الموبايل ولقطك رادار ats او شافك فرد المرور هيروح مخصوم منك نقطة وبكدة يبقى رصيدك من النقاط المتبقى لدى الدولة ٤٩ نقطة لو بعد شويه ركنت صف تانى هتلاقى ظابط المرور جه وعلقلك لزقة علي العربية بتاعتك بإن حضرتك راكن مخالف وبناء عليه فقد تم سحب نقطتين من رصيدك
جيت تانى يوم ركنت مخالف بس المرة دى عملت إعاقه لسيولة المرور فا هتلاقى ظابط المرور معلقلك ورقة مكتوب عليها إن حضرتك أتسحب منك ٣ نقاط يعنى المخالفة الأولى أم ٥٠ جنيه حاليآ هتبدأ غرامتها بنقطه لو عملتها أول مرة والمخالفه التانيه أم ١٠٠ جنيه حاليآ تبدأ غرامتها بنقطتين لو عملتها أول مرة والمخالفه التالتة أم ١٥٠ جنيه حاليآ هتبدأ غرامتها ٣ نقط لو عملتها أول مرة وبعد كدة بتبدأ النقط تتضاعف فى حال إذا ما تم تكرار نفس النوع من المخالفة
يعنى لو أتكلمت في الموبيل لتانى مرة هيتخصم منك نقطتين ولو أتكلمت لتالت مرة في المرة التالتة هيتخصم منك ٣ نقط ولو ركنت صف تانى لتانى مرة هيتخصم منك ٤ نقط وفى الركنة التالته ٦ نقط و لو ركنت مخالف وأعقت الطريق لتانى مرة هيتخصم منك ٦ نقط مرة واحدة وفي المخالفة التالتة لإعاقه المرور هيتخصم منك ٩ نقط مرة واحدة
وهيفضل كدة عداد النقاط بتاعك شغال طول ما أنت بتعمل مخالفات لحد لما ربنا يكرمك و وال٥٠ نقطة بتوع السنة بتوعك يخلصوا ، فى ناس هتخلصهم بعد شهر وفى ناس بعد شهرين وفى ناس بعد عشرة وفيه ناس مش هتخلصهم أصلا وأنت وشطارتك بقي المهم إن هما أول ما يخلصوا وتتمسك بعدها فى كمين مرور هيتم سحب الرخصة منك لمدة شهر وفى خلال الشهر ده طبعآ مش هتقدر تسوق عربيتك
بس هتسوق عربيه تانيه المرور هيبقى مجهزهالك اللى هى عربية مدرسة القيادة وده لأنك هتدخل إجباري لمدرسة القيادة عشان تتعلم قوانين المرور من جديد وبعد الشهر لما يخلص هيتعملك إمتحان سواقة
لو أنت نجحت فى الإمتحان هيقولولك ألف مبروك وهيبعتوك علي الخزنة هتروح علي الخزنة عشان تدفع غرامه ال ٥٠ نقطة اللى أنت أستهلكتهم اللى هما غالبآ قيمتهم هتبدأ من ٣ آلاف جنيه لحد ….
بعدها هتقدر تستلم رخصتك وتسوق عربيتك عادى خالص زى باقى الناس اللى فات ده كله كان فى حالة إنك خلصت كل نقاطك قبل إنتهاء مده السنه طب لو مخلصتهمش ؟؟
لو مخلصتهمش يبقى هتتحاسب عادى وقت التجديد لما هتروح تجدد رخصة عربيتك بعد سنة هيقولولك روح هات براءة الذمة
هتلاقى براءة الذمة طالع فيها عدد النقاط اللى أنت أستهلكتها طول السنة ولو مثلآ أنت أستهلكت ٣ نقط فقط طول السنة والتلت نقط من نفس نوعية المخالفة “مخالفة إعاقه الطريق مثلآ” دى قبل كده كنت هتدفع علي ال ٣ مخالفات ٤٥٠ جنيه دلوقتى هتدفع المخالفات
بس بنظام التكرار النقطة الأولى ١٥٠ جنيه والنقطة التانية ٣٠٠ جنيه والنقطه التالتة ٤٥٠ جنيه يبقى المجموع لنفس المخالفات ٩٠٠ جنيه فقط لاغير
تخيل بقي نفسك إنك أستهلكت ٢٠ نقطة وال ٢٠ نقطه طلعوا لنفس المخالفة أقعد أحسبها هتلاقى نفسك لابس فى ال ٣٠ ألف جنيه
القانون كمان بينص علي اختفاء ٤ سيارات من الشارع المصري : الميكروباصات اللي عمرها اكبر من ٢٠ سنة وسيارات التاكسي اللي عمرها ٢٠ سنة وعربات النقل المكونة من اكتر من مقطورة وسيارات الأجرة الغير مرخصة اللي مضي عليها اكتر من ٥ سنين
النظام جاي والمرور المحترم جاي ، رادارات ats الفرنسيه بتتركب ، الميكروباصات اللي عمرها اكبر من ٢٠ سنه هتتكهن ، التكاتك هيتم استبدالها بعربات فان بالغاز الطبيعي ، والقانون الجديد هيتطبق عشان يتكامل مع منظومة الطرق العالمية اللي بنملكها انهاردة ، عشان تكون مصر ٢٠٣٠ البلد اللي كلنا بنحلم بيها.